Nach zwei Nächt i de Oberland Lodge und Voll-Inclusive isches zrugg uf de Camping gange. Dass mer wider diräkt im Park gsi sind hemmer gnutzt und sind be Sunneufgang los. De Linda ihri Usduur bem Tier spotte hed sich uszahlt. Trotz höchst aspruchsvolle Verhältniss hed sie nach 2.5 Stund die zweiti Wildchatz in freier Wildbahn gsichtet – Leopard ✅ sogar mit emene Jungtier im Schlepptau. Uf ere ganz eisame Strass sinds über 5min vor üs her gloffe.
Lindas Katzenwelt auf Düne äää Wolke 7 😎
Für all die vo euch wo jetzt au bald in Flüger uf Namibia stieged und richtig Etosha Nationalpark stüred, da en guet gmeinte Tipp. Es mag zwar attraktiv töne imene Camp vo NWR innerhalb vom Park zˋübernachte und drum am Morge direkt nach Sunrise zmitzt im Gschehe zi, jedoch isch das mit dene staatliche Campingplätz sone Sach. Die beide wo mier attroffe hend, sind sehr verwahrlost deher cho. Es schint so, als hett mer sich vor villne Jahr mal vell Guets überleit, aber das i de letschte Jahr völlig sich sälber überlah. Wenn ned grad Hauptsaison isch, cha mer also guet au am Rand vom Park ufen alternative Camping und isch am Morge au nach 15 min (je nach Telefonierbedürfniss vo de Beamte 😅) im Park. Mer hend einisch au gar nüt müesse vorwiise be de Usgangskontrolle.
Us dem Grund hemmer entschiede scho en Nacht früener is Onguma Privat Game Reserve z’reise (private Campingplatz, statt staatliche), was sich als guete Entscheid usegstellt hed. Velecht simmer aber nach de Oberland Lodge chli fest verweicht und hend eus a die luxuriöse Verhältniss gwöhnt. S‘ Onguma Privat Game Reserve isch en 36’000 Hektare grosse private Park näb em Etosha Nationalpark. De Haag zwüsched dene zwei Pärk isch aber nüme so guet erhalte, drum chömed und gönd d’Tier wies wänd.
Nach dem grosse Catch (zwei Leopard) am Morge hed dˋLinda noni gnueg gha und isch am Abig no ufen Game Drive (Safari). Und hed ändlich en Löwin vo ganz nöch gsiched! De Dominic hed de „Hushalt“ gmacht und euses Schlafgemach vo Sand befreit.
Im Onguma Reserve hed mer dˋMöglichkeit au zˋFuess ufd Pirsch zga. Die Möglichkeit hemmer hüt am Morge gnutzt. Mer sind allei gsi mit üsem Guide em Engelbrecht und sim Gwehr. D Spure vom Leu sind no früsch gsi. Gseh hemmer en ned, mit grosser Wahrschindlichkeit aber er eus die ganz Ziit 😉
Die letschte Täg in Namibia nöched scho gli. No zwei Stopps und den simmer zrugg in Windhoek. 🥲
