Am 06.03. simmer in Waterberg acho (Waterberg Plateau Lodge). Waterberg isch bekannt fürs Naturschutzreservat wos 1972 uf em Plateau obe gründet hend. Das Plateau isch 50km lang und 16km breit. Im Plateau Park obe läbed ganz viel Tier wie Büffel, Nashorn, Antilope etc. D’Tier hends damals schins ufe gfloge und drum läbed die nume ufm Plateau obe und chönd vo sälber gar ned is Tal abe. Im Tal läbed, abgseh vo de Büffel, plus minus die gliche Tier. S’Tal gnüsst wäg de bedrohte Tierarte höchste Schutzstatus. Ide letschte paar Jahr hends Wilderer leider gschafft es paar wenigi Nashörner im Park z’töte. Drum gits jetzt im Tal en Nashorn-Patrouille rund um d’Uhr.
Da d‘ Lüüt wo patrouilliered immer wüssed, wo d’Nashörner sind, bieted d‘ Lodge es Nashorn Tracking z’Fuess ah. Obwohl mer scho mehreri Nashörner gseh hend, simmer am 07.03. mitgange. Leider isch d’Näbesaison langsam dure und mier sind dasmal ned allei gsi mitm Guide 😉 Mer hend vier Nashörner vo ganz Nöchem döffe bestuune. Mer sind üs aber leider fast ächli vorcho wie im Zoo…
Ufs Plateau ufe döf mer nume mitme Guide. Im Tal unne heds aber au Wanderwägli womer allei döf mache. Das hemmer ah dene beide Täg usgnützt. Zum Glück isch churz vorher öpper mit de Machete dure und hed s‘ höche Gras gschnitte 😉 Am Abig hemmer üs de no en private Guide gönnt, wo mit üs ufs Platteau ufe gloffe isch, es paar Fakte verzellt hed und üs be bester Ussicht es Tischli mit Snacks und Champagner vorbereited hed 😎
Am 08.03. ischs de scho wieder witer is Okonjima Nature Reserve. Üsi letschte zwei Nächt, bevor mer wieder uf Windhoek gönd und witer flüged. Und wie d’Rezeptionistin da gseid hed: Am Schluss chund s’Beste 😉 Es isch schwierig z’säge, was beste gsi isch, aber es isch uf jede Fall super schön da. Es isch es 220km2 grosses privats Tiereservat inkl. schöne Wanderwäg, ere schöne Lodge und sozäge Glamping! Statt ih üsem Dachzält, döfemer unerwarted ime grosse Zält mit zwei Bett schlafe 🙂
Au dezue ghört d’Stiftig AfriCat, wo wältwiit zu de grösste Geparde und Leoparde Rettigs- und Befreigsprogramm zällt. Sie hend ih ihrem Reservat rund 35 Leoparde und 17 devo chönd sie mithilf vomene Halsband tracke. (Näbeinfo: ab und zue gönd d’Leoparde underem Hag dure und uf en Nachbarsfarm. AfriCat bittet denn d‘ Farm, de Leopard ned z’schüsse und chund für de Verlust uf, wenn de Leopard Rind risst. Mer chan en aber ned zrugg is Reservat hole, well er eh wieder ih sis „neue Territorium“ übere wür). Obwohl mier im Etosha scho s’grosse Glück gha hend zwei schöni Leoparde z’gseh, simmer mit uf en Fahrt dur s’Reservat mit ere 50% Chance en Leopard z’gseh. De hemmer denn au gseh und d’Situation isch seehr spannend gsi zum beobachte! Als allerersts hed es Impala (Antilope) de Leopard entdeckt und isch ih d’Richtig vom Leopard gloffe, zum ihm signalisiere, dass er gseh worde isch. Denn heds Impala Luut vo sich gäh, wommer vo somene tier ned erwartet, zum d’Gnus rundume warne. Die hend sich de alli inere Reihe ufgstellt und sind langsam ufe Leopard zuegloffe (siehe Bild). Au d’Vögel hend all luut afo pfiffe. De Leopard hed denn sin Schwanz id Höchi ghebt und das heisst, dass er weiss, dass er gseh worde isch und niemer jagt. Zum Erstuune vo üsem Guide isch er grad näb üsem Auto dure gloffe. Es hed sich de usegstellt, dass er vor es paar Stund oder Täg en Springbock, woner töted hed, in Baum uf de andere Strassesite ufeghänkt hed. Er isch ih Baum ufe klättered und hed det gmüetlich am Springbock witergässe (siehe Bild). Trotz de spannende Beobachtige, hemmer üsi erst unerwarted Begägnig mit de beide Leoparde im Etosha idrücklicher gfunde. Villicht, will mer ganz allei gsi sind mitne 🙂 S‘ hed sich ned agfühlt wie imne Zoo.
Mer hend uf de Fahrt nomeh Spanneds und Sältnigs gseh. Mer hend s’erste Mal en bruni Hyäne gseh (sogar zwei) und de no en Pangolin. Das isch es Schuppetier wo nur sälte gsichted/gfunde wird. Au üse Guide, wo sit 11 Jahr da schaffed, hed erst wenigi gseh. Nach de Sichtig vom Pangolin isch sofort d‘ AfriCat Stiftig informiert worde. Sie hend de Pangolin tagged, zum in Zuekunft sis Verhalte chönne analysiere. Und vermuetli au, zum ehn wieder finde und de Touris zeige 😉
