Am 09.05. simmer öppe am 00:30 mitm Zug vo Ed in Stockholm acho und zu üsem Hostel (Generator Stockholm) gloffe. Über d’Hälfti vom 10.05. hemmer mit Usschlafe und Wösch wäsche und tumblere verbracht (de Linda ihri Chappe heds leider ned überläbt 🥲).
Wells Wätter ned so de Hit gsi isch, hemmer d’Strass mit de Outdoor Läde abklappered und sind is Fotografiska Museum. De Dominic hed usegfunde, dass d’Hockey WM grad in Stockholm und Dänemark isch und hed drum sponti viel Gäld für s’Spiel Schwede/Östrich am Sa 11.05. usgeh. Mer hend zwar beidi ned viel Ahnig vo Hockey, aber d’Plätz sind würkli guet gsi und s’Stadion volle. De chli Fansektor vo de Östricher hed definitiv besser und lüüter chönne fane als all Schwede zäme. Bis uf die letschte 5min, wo öppe all Goal vo de Schwede gfalle sind. So hed Schwede schlussändlich doch no 4:2 gwunne. Lindas Highlight: d’Schlange vor em Fraue WC isch viiiiel chürzer gsi als die vor em Manne WC.
Am Su 12.05. hemmer üs mit U-Bahn, Bus und Fähri ufe Wäg in Schäregarte vor Stockholm gmacht. Mer hend für zwei Nächt es Hüsli mit Meerblick uf de ganz chline Insle Idöborg gmieted. Be de Akunft hemmer usegfunde, dass die Insle vor allem für 3 tägigi Hochziite gnutzt wird. Mer sind froh gsi, wo die wohl no atrunkne Gäst d’Insle im spötere Nami verlah hend und mier d’Insle (abgseh vo es paar Agstellte) für üs allei gha hend 😉
De ganz nächsti Tag hemmer mitme 18km lange Spaziergang und üsne Büecher uf de grosse Insle Runmarö verbracht. Det gits sogar e Lade und es Restaurant (wo aber nur am Wuchenänd offe hed 😥)! D’Fährefahrte, d’Insle mit ihrne schöne rote oder anderstfarbige Hüsli und die schöne Ussichte ufs Wasser hend üs sehr gfalle 🙂
Am Di 13.05. hemmer d’Schäre leider scho wieder verlah, sind zrugg uf Stockholm und hend d’Stadt am Namitag ändlich be chli Sunneschiin chönne entdecke. Am 18:00 hemmer de Nachtzug uf Narvik (Igangstor zu de Lofote) bestiege. Mer hend vor es paar Wuche verhältnismässig günstigi Billett für en Zweierschlafwage kauft. D’Fahrt sött 18h duure. Inzwüsche hends aber scho 190 Minute Verspötig duregeh. Well mer ja öppe 21h Ziit hend, hemmer sogar s’erste Mal d’Duschi im Nachtzug tested und sind positiv überrascht. Sie isch fast grösser als Duschi und WC zäme ih üsem letschte Hostel 🤷♀️
