Am 10.06. am spötere Namitag hemmer üs in Oslo am Bahnhof troffe und sind als ersts ih üse Lieblingswäschsalon Clean Kokos (gits in mehrere Städt da). Während de Wartezite hemmer Apèro gha und Znacht gässe. Am 22:25 isch üse Nachtzug in Richtig Stavanger (im Südweste vo Norwege) gstarted und am 07:20 simmer scho acho. In Stavanger hemmer es Auto für die nächste 10 Täg gmieted. Vom Büssli- und Camperläbe und vom Jede-Tag-witerreise hemmer langsam gnueg, drum hemmer für die nächste vier Nächt es Hüttli ufeme Campingplatz gmieted.
Well mer s’Auto erst am Namitag hend chönne abhole, hemmer de sunnig Morge in Stavanger gnosse. D’Linda isch begeistered gsi vo all dene schöne, farbige, kitschige und dekorierte Hüsli, Strasse, Kaffis und Brokis! Es Linda-Paradies sozäge 😉 De Domi hed nach 6 Täg in Oslo kei Lust meh gha zum d’Stadt erchunde und hed drum imene härzige Büecherkafi chli gläse.
Vo Stavanger simmer am Nami mit em gmietete Elektroauto zu üsem Camping in Suleskart gfahre (ca. 1h 45min). Bem Camping acho hemmer gmerkt, dass üses Auto nume langsam chan lade (dured ca. 8h) und de Schnelllader ned funktioniert. Drum hemmer am 12.06. leider nomal müesse uf Stavanger fahre zum s’Auto wächsle. (Opel Mokka e – isch also kei Chaufempfählig. Im Gägesatz isch de MG 5 überraschend guet für de Priis). Ufm Rückwäg hemmer ide Nöchi vom Frafjord ghalte und hend en sehr schöni ca. 5 stündigi Wanderig zum Ramnstoknuten gmacht. Im Nachhinein hemmer gseh, dass de Gipfel als neus Insta-Highlight bezeichnet wird. Trotzdem simmer uf de ganze Wanderig nur 4 anderne Lüüt begägnet 🤷♀️😊
Am dritte sunnige Tag in Folg hemmer üs für die bekannt Wanderig zum Kjeragbolten am Lysefjord entschiede. Es isch „nur“ die chli Schwöster vo de Topwanderig ih dere Gägend (Preikestollen) und drum hemmer ghofft, dass es ned allzu überloffe isch. Mer sind ufm Wäg zwar sehr vielne Lüüt begägnet, aber s’Zmittagsplätzli am Ziel hemmer nur mit wenige Lüüt müesse teile. Ufm Hi- und Rückwäg heds üs fast devo gwindet und drum heds üs gar ned agmacht, uf de Stei z’stah, wo zwüsche zwei Felse iklämmt isch (Fotimotiv Nr. 1 ih dere Gägend). Det gats nämli würkli eifach über 1000m de Stutz durab wemmer en falsche Tritt macht. Leider hemmer erst nach de Wanderig usegfunde, dass es det hinne no en andere Ussichtspunk gid womer über de ganz Lysefjord gsed 🙁
Au am 14.06. hed d’Sunne nomal gschune (mer glaubeds fast ned!) und mer sind ganz ide Nöchi vo üsem Hüttli uf de Hilleknuten gloffe. Well mer scho fast uf Kaffi-&-Zimtschnägg-Entzug sind, hemmer d’Wanderig chli abkürzt und sind zu de sehr feine Bäckerei „Hekta“ gfahre. S’hed sich glohnt 😉
