Uf de Bagatelle Kalahari Ranch, womer bis gester no gsi sind, hends vier Geparde. Gepard überläbed ide Natur nume, wenns zwei Jahr lang mitm Mami chönd mitlaufe und lerne. Die Geparde wo sie uf de Ranch hend, hend s Mami verlore und sind vo ihne ufgnoh worde. D Ranch isch inzwüsche ide Region bekannt defür, dass sie sich mit Geparde uskännt und drum hends z.B. au scho en Gepard vomene Buur übernoh, wo de jung Gepard als „Huuschatz“ ghalte hed (de Gepard fahrt drum z.B. gern Auto und isch gern um Mänsche ume) und irgendwenn nüme mitm klar cho isch. D’Geparde uf de Ranch sind mitme Haag vo de andere Tier trännt. Bem Bestuune vo de Geparde hemmer au no härzigi Erdmändli gseh.
Ufm Wäg zu üsem nächste Campingplatz hemmer no de Köcherbaumwald besichtiged mit ganz spezielle Bäum wo ibettet sind inere Steilandschaft.
Uf üsem aktuelle Campingplatz uf de alte Kalköfen Lodge (ja, da hends früener Zemänt hergstellt und de alti Ofe isch no erkännbar) heds nüme ganz so viel Tier. Nur tüpfleti Hüener, en verschmusti Chatz und Eidechse wo sozäge mit üs dusched. Well mer da au sust ned so viel aktivs chan mache (kei Höhemeter :(), haltemer üs mit jogge um de Campingplatz, Youtube Workouts und Runde schwimme im Pool fit. Aber mer nämeds ned z’sträng, schliesslich hemmer ca. 34 Grad 😉 Ide chüele Morgestunde (7.00) hemmer en chlini Wanderig ide Umgäbig gmacht. Oder eher en Schnitzeljagt. Da mer chüz und quer dur d Wüesti gloffe sind, hemmer immer wieder die nächsti Wanderwägmarkierig müesse sueche.
Funfact: D’Bsitzer:inne vo dere Lodge säged, de offiziell Name vom Internetabüter MTC isch „most terrible company“ ;P dementsprächend hed de Dominic sehr lang gha, bis er uf Teletext usegfunde hed, wer Bundesrat worde isch (aber mer sind hald au zmitzt ide Wüesti usse 🤷🏻♀️).
