Gester simmer de ganz Wäg vo de alte Kalköfen bis zu üsem Campingplatz, ide Nöchi vom Fish River Canyon, uf Chiesstrasse gfare (ca. 2h). Ufm Wäg hed de Domi sponti bimene wunderbare Kaffi aghalte. Also eigentli ischs en Distilerie, aber sie hend au es Kaffi mit em beeeeste Rüebli-Dattel-irgendöppis-Cake! En Dattelgin hemmer de natürli au grad kauft, nachdem mer d Ussicht uf d Dattelbäum gnosse hend.
Acho ih üsere neue Lodge (zum Verständnis: die meiste Campingplätz ghöred zunere Lodge womer denn d Usstattig vo de Lodge döf mitnutze) hemmer chli müesse schmunzle. D Reisegruppe Germans (wie mier sie nänned) isch au scho wieder da. Sie „verfolged“ üs scho sit em Köcherbaumwald vor es paar Täg. Mer hetted de ganz Park/Wald für üs allei gha und de isch ihres Büssli uftaucht. Nachher hettemer d Kalköfen Lodge für üs gha und 30min spöter isch d Reisegruppe Germans wieder uftaucht. Und au hüt sinds 60min nach üs wieder am gliche Ort acho 🤷🏻♀️ (mier blibed jetzt aber 3 Nächt da und sie nume eini ;))
Bem Zmittag hemmer gluegt, was es ih dere Gägend und be üsem nächste Stopp so z due und z gseh gid. Mer hend festgstellt, dass d Aktivitäte ih dere Jahresziit (Summer, 35 Grad) im Süde (womer jetzt sind), rächt igschränkt sind. Mer vermissed s Wandere 🙁 Drum hemmer üs im Reisefüer und Co. informiert, wos ächli chüeler chönnt si und meh Wandermöglichkeite hed. Mer hend drum üse nächsti Stopp, wo no witer südlich wer, gstriche und fahred scho früener ih die nördlich Richtig. Zuesätzlich hemmer en Lodge ide „Berge“ bueched (zerst chömed aber no zwei anderi, planti Destinatione).
Gester im spötere Namitag, wo ändlich Wolke ufzoge sind, hemmer no e chlini aber schöni Wanderig gmacht. Sie hed grad hinder üsem Campingplatz gstarted. Hüt am morge simmer am 6i zum Fish River Canyon gfahre. Das isch de grössti Canyon nach em Grand Canyon ide USA. Mer chan erst ab Mitti April gfüerti, mehrtägigi Wanderige in Canyon abe mache. Drum hemmer de Canyon ide chüele Morgestunde vo obe bestuunt. D Grössi isch würkli idrücklich! Da mer ned am klassische Ussichtspunkt blibe sind, sondern es Halbstündli hindere gloffe sind, simmer ganz allei gsi. Obwohls au sust nume wenig Lüüt hed abgseh vo de Reisegrppe Germans und de Reisegrppe Chamäleon (Vorteil devo, dass mer ned ide Hauptsaison da sind juhuuu 🙂 ).
Ufm Rückwäg zu üsem Camping hemmer en Kaffistopp ide „Partnerlodge“ vo üsere gmacht. Die isch ächt toll aber vermuetli au ächt tüür 😉 S Hightlight (de Linda ihres Herz isch ufgange) sind die viiiiiele mega härzige Klippschliefer gsi, wo ufm Felse näb de Kaffitischli umegsprunge sind. Sie gsehnd chli ähnlich us wie Murmeli. Und übrigens hed die Lodge de Umgäbig vo High School Musical 2 gliche 😉
Am Nami hemmers nochli am Pool chillt und im spötere Nami de erst Wind und Räge erläbt. Drum hemmer entschiede, dass mer im Resti Znacht issed und ned sälber choched.
