Nachdem mer uf zwei Campingplätz üses eigne Hüttli mit WC, Lavabo und Duschi gha hend, isch es fast ächli komisch, dass es be de letschte zwei Plätz kei sones Luxushüttli meh gha hed. Aber mer hend üs au schnell wieder dra gwöhnt Duschi und Co. z teile 😉
Am Morge vom 15.03. hed üse Wecker wieder am 5:25 glüte, dass mer die drüstündig Wanderig hinder de schöne Lodge mit de Klippschliefer be agnehme Temperature chönd mache. Es hed sich glohnt! D Ussichte sind grossartig gsi. Eis vo de Highlights ischs Loch ide Felswand. D‘ Wanderig füert dur das Loch dure. Wieder zrugg be de Lodge hemmer Kaffi bstellt (d’Linda wird da no zur Kaffitrinkerin…) und gfragt, ob mer au no öppis chlises z’Ässe chönd ha. Z.B. es Stückli Chueche oder so. Zur Antwort heds nume es „aha“ und „okee“ geh und drum simmer gspannt gsi, was mer überchömed. Sie hend üs fast e ganze Brunch inkl. Spiegelei, Pancackes und natürli em gwünschte Stuck Chueche qbracht! Und dennoh gratis hemmer am Schluss usegfunde. Sie hend gmeint, mer seiged ja ih ihrere Partnerlodge unterbracht. MERCIII 🙂
Ih de Regel simmer au ohni Wecker spötistens am 6i wach, denn wenn sich de Himmel schön rot fad afo verfärbe. Meistens chömmer s Spektakel vom Sunneufgang sogar diräkt us em Zält mitverfolge. Und well de Himmel fast immer wolkelos isch, sind au d Sunneuntergäng immer sehr schön. Mit em Fötele hemmers aber langsam ufgeh, well d Kamera die schöne Farbe eifach ned richtig ifangt 🙁 Au de schön Sternehimmel hemmer gester Abig versuecht festzhalte. Üsi Caminingnachbare hend aber chli z starchi Lampe gha…
Am 16.03. hemmer üs ufe Wäg zu üserem nächste Campingplatz in Aus gmacht (Klein Aus Vista). Mer sind wieder ah dem Kaffi mitm feine Rüebli-Dattel-Cake verbigfahre und hend üs e Stopp ned entgah lah (mer sind wieder die Einzige gsi, hoffentli hends ide Haupsaison meh Gäst). Mer hend sogar no es Stuck Chueche zum Mitneh gnoh 😊🍰 Uf de Witerfahrt hemmer diversi Tier gsichted wie Zebra, Giraffe und en Adler (chönnt au en andere grosse Vogel gsi si, mer sind kei Profis ;)).
Gester Abig hed üs bem Znacht ufm Campingplatz en Nachtwächter/Ranger mit sinne zwei Hünd bsuecht und erklärt, wie mer üs binere Begägnig mit ere Schlange, Skorpion (beidi gföhrlich ih dere Umgäbig), hässige Affe und Füchs (mer hends Tier ned kännt, aber er hed gseid, es isch ähnlich wie en Fuchs) müend verhalte. Ischs beruhiged oder eher beunruhigend, dass es uf dem Camping en Nachtwächter hed? Mer sind üs ned einig…
Aus isch es chlises Döfli und vor allem als Usgangspunkt für Usflüg id Umgäbig dänkt. Usserdem ischs für bekannt für die wilde Ross wos da ide Umgäbig hed. Die hemmer uf üsere Fahrt dahere gsichted. Mer hend hüt entschiede, dass mer uf d’Sehenswürdigkeite, wo doch nomal mindistens 1.5h entfernt sind, verzichted und hend stattdesse d’Natur und d’Wanderwäg erchundet.
