D‘ Wättervorhersag für die nächste Täg isch leider immer die glich: Wölkli ohni Sünneni 🙁 S’Wätter ändered da aber sehr schnell und mehrmals pro Tag, drum hemmer zum Glück doch no es paar Sunnestrahle gseh ide letschte Täg.
Die erst Nacht hemmer in Svolvaer verbracht, das isch eini vo de grössere Städt ide Lofote. Am 15.05. hemmer en Wanderig uf en Berg hinder Svolvaer gstarted, d’Ussicht sötti super si (aber es isch sehr bewölkt gsi, null Sunne). Leider hemmer d’Wanderig müesse ufgeh, well alles nass gsi isch und mer chum vorwärts cho sind. Mer sind drum ca. 2.5h mit em Auto (womer für en Wuche gmietet hend) uf Å gfahre. Das isch s’hinderste Dorf uf de Lofote. Det hemmer es sehr härzigs, chlises Hostel (Å HI Hostel) bezoge. Spöter, am 19:30 nach em Znacht, hemmer nomal en Wanderig gstarted, aber au die hemmer abbroche, wells immerno sehr vell Schnee und drum au vell Schmelzwasser hed. Da d’Sunne erst am ca. 23:30 untergad und vor em 02:30 wieder ufgad, chamer de Tag sehr individuell gstalte 😉
Am 16.05. simmer mitm Auto ca. 40min uf Fredvang gfahre. Det hemmer zwei verschideni Wanderige gmacht. Mängisch heds grägneled, mängisch isch aber au biiitzli blaue Himmel füre cho 🙂 Am Abig simmer früeh go schlafe, well de Wecker uf die 3:30 gstellt worde isch. Gmäss Wätterbricht (de isch zwar immer mit Vorsicht z’gnüsse) ischs am nächste Tag nur zwüsche 3:00 und 6:00 sunnig. Die Ziit hemmer welle nutze, zum de Reinebringen bestiege. En Wanderig chamers ned nänne, de Wäg bestad nämli eifach us 1978 Stägetritt (ca. 440 hm und 1.1 km). Am 04:50 simmer dobe acho und d’Ussicht isch grandios gsi. Es isch denn zwar de ganz Tag sunnig gsi, aber immerhin heds am Morge früeh no fast kei Lüüt gha 😉
Nachdem mer nomal 3h gschlafe hend, simmer mitm Auto fast 4h uf Lødingen gfahre, das isch ganz obe ade Lofote. Ufm Wäg hemmer no ah es paar schöne Ortschafte aghalte (Reine, Nussfjord, Henningsvaer), hend d’Lofote us em Autofänster bestuunt und de schön sunnig Tag gnosse. Bem Znacht ih üsem schöne Hotel/Hostel (Lødingen Brygge) hed üs en bitzli alkoholisierte Stammchund Gsellschaft gleisted und üs unterhalte. Vor allem am Domi hed er sehr Freud gha 😉
D’Wättervorhersag füre 18.05. isch wunderbar gsi. Drum hemmer nach Zmorge be strahlend blauem Himmel en Rundwanderig ufe Lødingsaksla (uf 569 MüM) gstarted. Ufm erste Gipfel uf 469 MüM ischs Wätter no schön gsi und am Schnee hemmer no guet chönne us em Wäg gah. Womer de Lødingsaksla sind afo ufechraxle ischs Wätter immer schlächter worde. Churz bevor mer dobe gsi sind, hemmer entschiede, dass mer zrugg gönd. D’Wolche sind immer dichter worde und mer hend ned gwüsst, wie viel Schnee uf em andere Wäg liid. Drum simmer alles wieder abekraxled und sind de glich Wäg zrugg. Zwüschedure hemmer nüme witer als 10m gseh. De Mr. Orientierig hed üs natürli wieder ufe Wäg bracht und plötzli hemmer s’Städtli under üs gseh. S‘ Städtli isch no voll ide Sunne gsi und s’Meer hed so türkis glüchted, es hetti chönne uf de Maledive si. Aber üs heds währenddesse im Berg obe fast weggwindet und mer sind voll ide Wolche inne gsi 🤷♀️ Dunne acho hemmer üs die öppe 54igst Zimtschnägg gönnt.
(Lødingen isch ned sehenswert. Mer sind nur da, wells en guete Usgangspunkt für üsi planti Drütageswanderig isch. Die hemmer ufgrund vo de Wätter- und Schneeverhältnis jetzt aber uf zwei Täg müesse chürze).
