Uf ere verhältnismässig churze Fahrt, well sie nume en halbe Tag und ned en ganze dured hed, simmer vo Maun uf Nata gfahre. Det hemmer s’Nata Bird Senctuary bsuecht. En Nationalpark wo vor allem für d’Pelikan und Flamingos bekannt isch. Die hemmer allerdings ned gseh 😉
Am 17.04. simmer am 5:30 in Nata abgfahre, zum am 11:00 en Game Drive (Safari) im Chobe National Park mache. Mer hend det glernt, dass die männliche Giraffe ganz anderst mitenand kämpfed als anderi männlichi Tier. Sie stönd parallel und schlönd sich nur öppe all halb Minute mit de Hörner einisch gägesitig uf de Rugge. Sie kämpfed so langsam, well sie immer wieder Usschau halted, zum luege, ob en Leu ide Nöchi isch. Es gsed harmlos us, ischs aber schins ned.
Am spötere Namitag hemmer sozäge en Safari ufm Wasser gmacht und hend üse ersti Büffel gseh. Big Five sind also komplett 😉 Näbst em Büffel hemmer au chlini und grösseri Krokodil gseh und Nilpferd.
Am nächste Morge isch en Grossteil vo de Gruppe nomal uf en Game Drive im Chobe NP. Mier hend üs aber entschiede, dass mer usschlafed und ändlich wiedermal chli chilled, bevor mer üs ufe Wäg zu de Victoria Fäll in Zimbabwe mached. D’Fahrt isch nume ca. 1h gange, allerdings hemmer 2h ade Gränze verbracht, bis alli ihres Visa für Zimbabwe gha hend. Sehr viel Bürokratie… Da heds vermuetli ghulfe, dass de Richard sich mit de Beamte uf ihri Sprach hed chönne verständige. Abgseh devo, hemmer aber s‘ Gfühl, dass mer die Reis au guet z’zweite (mit em eigne Mietauto) hetted chönne mache. D’Strasse in Botswana sind sehr viel besser als die in Namibia. Üse Choch, de Inok, isch us Botswana und hed üs versichered, dass es es sehr sichers Land isch und s’keis Problem isch, allei umezreise. Er hed gseid, er gad ned gern uf Südafrika, well er sich dete ned gnueg sicher fühlt. Und drum tönts plausibel.
Nachdem mer uf üsem Camping in Victoria Falls acho sind, hend die einte die 3h vor em Znacht scho wieder voll mit Programm gfüllt. Mier sind is chline Städli go Aperöle (äändlich heds richtige Chäs geh) und hend d’Freiziit gnosse. Am Abig hend 6 Fraue us Zimbabwe für üsi Gruppe koched und mer hend de letschti Abig mit de ganze Gruppe verbracht. Am nächste Tag hend sich die meiste verabschied (in ganz viel verschiedeni Richtige). Nume 6 vo üs reised witer dur Zimbabwe zrugg uf Johannesburg und es chund nur ei neui Person dezue. Mer hoffed, es wird dur das ächli relaxter 🙂
Am Ostersunntig hemmer „frei“ gha 😀 Am Morge simmer mit es paar anderne in Victoria Falls Park zum die riese Wasserfäll bestuune. 50 US Doller hed de Itritt kosted 😲 Und us em Bestuune isch ned so viel worde, wells grägnet hed und chli näblig gsi isch. Pflotschnass simmer aber ned wäg em Räge gsi, sondern wäg de Wasserfäll 😉 Am Namitag simmer über de Fluss be de Wasserfäll ziplined und hend es paar Sekunde die schön Ussicht gnosse 🙂
