Am 19.05. hemmer üsi ursprünglich plant Drütageswanderig zu de zwei DNT Hütte Toralfsbu und Haakonsbu am obere Ändi vo de Lofote gstarted. Uf Grund vom Schnee hemmer entschiede die zweit Hütte wegzlah. Während em Ufstieg zu de erste Hütte hemmer festgstellt, dass au dee Wäg ohni richtigi Wanderschueh ned lustig isch. Drum hemmer umkehrt und sind stattesse spontan zu de Grønnkollen Hütte gloffe, wo nur uf 220 MüM liid. Ufm Wäg isch d’Sunne no bitzli fürecho und mer hend d’Hütte für üs allei gha. Nachdem mer im Bach Wasser gholt hend zum Choche, und es Füür im Cheminee gmacht hend, hemmers üs mit üsne Büecher bequem gmacht.
Am Morge simmer zrugg zum Auto gloffe, witer gfahre und hend no en churzi Wanderig zum Keipen gmacht, wo über Harstad liid. De Gipfel isch zwar uf 487hm, aber da de Parkplatz uf knapp 300hm liid, hemmer ned soo lang müese dur de Schnee stapfe ;). Zrugg in Harstad hemmer üs imene Kaffi ufgwärmt und hend üsi letscht Nacht ih dere Gägend grad no in Harstad bueched. Am 21.05. hemmer de üses Mietauto abgeh und sind mit Bus und Fähri uf Tromsø greist (ca. 4h). Det hemmer üse Abig hauptsächlich imene sympathische Wäschsalon verbracht 😉
Tromsø isch de Startpunkt vo üsere Reis mit de Hurtigrute bis Bergen. Ursprünglich hemmer d‘ Hurtigrute nume bis Trondheim bueched, hend üs aber es paar Täg vor de Abfahrt entschiede, dass mer bis Bergen wend fahre. Üsi Hoffnig isch, dass es det chli wärmer isch, wells witer südlich isch 😉 S’Verlängere vo üsere Reis hed sich als ned so eifach usegstellt (bzw. die glich Kabine chönne bhalte). Au da lad de Chundeservice leider z’wünsche übrig 🙁 Villicht nämeds üs au eifach ned so erst, well mer minimum 30 Jahr jünger sind als die andere Reisende 😉 Aber uf das Durchschnittsalter hemmer üs igstellt.
TRICK 77 für Hurtigrute-Buechige: Uf de norwegische Domain bueche isch 40% günstiger als uf de schwizer 🥲
Da s’Hurtigruteschiff erst am 1:00 ide Nacht (am 23.05.) started, hemmer no de ganz Tag in Tromsø chönne verbringe. Mer hend usgnützt, dass mer erst am 12i hend müesse us üsem Hostel uschecke und hend am Morge no üsi Reis ab Bergen witer planed. Am Namitag simmer zerst inere Halle go bouldere und spöter simmer chli dur Tromsø flaniert und hend amene Strassestand „the best Hotdog of the world“ gässe (es isch eher es Vegischnitzel mit Brot und Sauce gsi, aber fein) 😉
Am Abig simmer dick ipackt ide Sunne gsässe und de Domi hed online ade Waldstocksitzig teilgnoh. Am 21:30 hemmer de no de Linda ihre Wunsch erfüllt: Mer sind ufe Fjellheisen, de Berg über Tromsø, ufegloffe bzw. dur de Schnee gstapft (zum Glück hed d’Linda so krassi neui Wanderschueh zum de Wäg vortrample). Am 22:30 simmer dobe gstande und hend die wunderschön Ussicht be strahlendem Sunneschiin ☀️. Es isch nämli grad d’Ziit vo de Mitternachtssunne, das heisst, d’Sunne gad nie under 😍 De Rückwäg isch denn schnell gange, well mer vor allem uf de Händ, Füess und em Füdli abegrutscht sind ❄️
