Obwohls mit nur no 7 Reisende dütlich meh Spass macht und alles schneller vorwärts gad, ischs Motto vo dere Tour gfühlt immerno: 0 Freiziit, 0.0 Bewegig. Mer sitzed entweder ih üsem Truck vo A nach B, ihmene Safariauto oder ufeme Boot. Laufe düemer max. vo üsem Zält zum WC 😉 Für meh blibt au kei Ziit… D‘ Länder womer bereised (im Momänt Simbabwe) sind sehr schön und interessant, üs gfallt eifach die Art vom Reise ned.
De Tag im Hwange National Park hemmer trotzdem sehr schön gfunde. Am Morge hemmer im „Wildlife Trust“ meh über d’Rettig und Rehabilitation vo de Tier ih de Umgäbig erfahre und hend no vor em Mittag üse neu Campingplatz mit wunderschöner Ussicht erreicht. Leider blibemer nume ei Nacht da 🙁
Am Namitag hemmer de Hwange NP erchundet und hends mitenand sehr lustig gha. Usserdem hemmer uf de Bäum zwei Leoparde entdeckt und ganz ide Nöchi vo üsem Camping isch eh riiesigi Elefanteherde am trinke und bade gsi. De Sternehimmel hed ah dem Abig wunderschön gstrahled, aber leider hemmer wäg de viele Tier ih de Umgäbig ned mal drü Schritt döffe mache für es schöns Föteli (s’hed kei Hag gha um üse Platz). Vermuetli hends en witeri Begägnig mitme Leu welle vermide 😉
Am 20.04. simmer de ganz Tag ih üsem Truck gsässe, nachdem mer am Morge s‘ „Painted Dog Conservation Center“ bsuecht hend. Mer hend det meh über d‘ wild Dogs (au gnännt painted Dogs) vo Afrika glernt. Am Abig hemmer mit de Kate immerhin es paar wenigi Schritt gmacht und hend per Zuefall en schöne Ussichtspunkt gfunde. Am nächste Morge sind d’Linda, d’Kate und d’Jillian det de Sunneufgang inkl. Kaffi und Tee go gnüsse. De ersti schön und ruhig Morge uf dere Reis (bevors am 7:30 scho wieder Zmorge geh hed und losgange isch)…
De restlich Tag isch dureplant gsi. Mer hend im Matobo NP Nilpferd gsuecht und gfunde (wie immer white Rhinos und kei black Rhinos, well die aggressiver sind). Mer hend es Memorial mit schöner Ussicht bsuecht, Hölemalerie agluegt und es traditionells „Städtli“ bsuecht. Mer hetted gern erfahre und besser verstande, wie s’Läbe det funktioniert. Leider hends üs aber vor allem mit Shows versuecht z’unterhalte.Letscht Nacht heds duregrägnet und mer hend festgstellt, dass üsi Zält und de Truck ned so dicht sind wie Wicos und Spatz 😉
Und hüt am 24. sitzemer wieder de ganz Tag im Truck inkl. Gränzübergang Simbabwe – Südafrika.
