Will d’Linda ide Lehr viel Hurtigrute Läserreise verchauft hed, hed sie unbedingt es paar Nächt uf em Hurtigruteschiff welle verbringe und so d’Küste vo Norwege bestuhne. Ursprünglich hemmer vo Tromsø nur bis Trondheim welle fahre (2 Täg), schlussändlich hemmer üsi Reis aber bekanntlich bis Bergen verlängered (3.5 Täg). Mer hend inzwüsche gmerkt, dass üs zwei Täg ufm Schiff allerdings glanged hetted 😉
Die erste zwei Täg hemmer viel Glück gha mitm Wätter und hend superschöni Ussichte chönne gnüsse wie z.B. be de Fahrt is Trollfjord (be de Lofote). Spöter hemmer in Svolvaer chönne usstiege, hend det Znacht gässe und hend zrugg a Bord de sunnigi Abig no im chline Jacuzzi lah usklinge. Au s’chline Fitness mit zwei Laufbänder, eim Ruedergrät, eim Velo und es paar Hantle hemmer gnutzt. Näbst Svolvaer simmer ih dene 3.5 Täg au no ah anderne Statione churz usgstiege. S’Schiff hed aber nie länger als 3h ghalte.
Schlussändlich hend üs d‘ Hurtigrute leider ned ganz chönne überzüge. D‘ Ussichte und s’Schiff scho, aber die übertürte Prise und s‘ ned hilfsbereite Personal ned. Zum mal chli abschalte und nüt überlege heds aber guet tah 😊
Üse Plan, Norwege mit Bus und Zug z’bereise hemmer leider müese über de Huufe rüere. D’Verbindige, d’Recherche und all die verschiedene Abieter mached üs chli wahnsinnig. Drum hemmer am 26.05., nachdem mer s’Schiff verlah hend, ab Bergen es Büssli gmieted für die nächste 10 Täg. Well s’Gäldusgeh langsam chli „weh“ macht, hemmer üs nur es chlises gleisted 😉
Am Namitag simmer mit em Büssli de grad witer zum Nærøyfjord gfahre und hend det ufmene Plätzli anere Waldstrass übernachted (bi Jordalen). D’Schaf hend näbe üs grased und sind üses Auto go beschnuppere. Am Morge vom 27.05. hemmer die churz rägefrei Phase gnutzt und sind ufe Rimstigen gloffe. Vo det hemmer en wunderbari Ussicht uf de Nærøygord gha. Leider heds no während em Ufstieg afo rägne. De Domi hed de Schirm ufgmacht und isch vo dene wenige Lüüt womer gseh hend chli schräg agluegt worde. Aber die sind demfall nonie mitme schwizer Bergfüerer:in go wandere 🤷♀️
De verrägnet Nami hemmer imene Kaffi bem Nærøyfjord und inere Boulderhalle in Sogndal verbracht. Am spötere Namitag hemmer üs spontan ufe Wäg zum Jostedal Camping, ide Nöchi vomene grosse Gletscher (Jostedalsbreen), gmacht, zum mitm Keisi und de Nina Znacht ässe und campe.
Die beide hend füre nächst Tag (28.05.) en halbtägigi Gletschertour bem Nigardsbreen bueched. Mer hend üs denn 1h vor de Tour entschiede, dass mer au mitgönd, da mer ih dem Wätter (Räge isch agseid gsi) eh kei anderi schöni Wanderig hetted chönne mache. Wemmer scho mal ufme Gletscher gsi isch, ischs nüt speziells/neus gsi, aber es hed Spass gmacht mit dere guete Gsellschaft 🙂
