Am Zistig 25.03. simmer vo Swakopmund witer uf Spitzkoppe gfahre. Es isch zum Glück mit ca. 2.5h en churzi Fahrt gsi. Spitzkoppe isch es ganz chlises Dörfli mit es paar „Blächhüttli“ wo Hereros und Himbas wohned. Das isch eini vo mehrere Völkergruppe wo in Namibia läbt. Die beide ghöred sozäge zum gliche Volk, d’Himba läbed aber im Gägesatz zu de Herero no ganz traditionell.
De Campingplatz in Spitzkoppe (Spitzkoppe Campsite) isch riesig. S‘ Ziel devo isch, dass es sich afühlt wie wild campe. De Campingplatz isch um de Berg „gross Spitzkoppe“ (1728m) und d‘ Pontok Berge (1629m) ume. Die gross Spitzkoppe wird au „Matterhorn Namibias“ gnännt.
Am Zistig nach de Akunft hemmer ned viel gmacht, well d‘ Linda ide Nacht vorher erbroche hed und Durchfall gha hed. Zum Glück no in Swakopmund, womer es Zimmer gha hend 😉 Au de nächsti Tag simmer drum gmüetlich agange und sind dur de Park spaziert und hend d‘ Ussicht vo de chlinnere Hügel us gnüsse. Well mer unbedingt no die gross Spitzkoppe oder d’Pontok Berge hend welle bestiege, hemmer üse Ufenthalt in Spitzkoppe um en dritti Nacht verlängered.
Da mer die zwei „Bergtoure“ nume mit eme Guide döf mache und am Donnstig 27.03. kei Guide uf die gross Spitzkoppe isch, hemmer eine vo de Gipfel vo de Pontok Berge bestiege. Üse Guide, de Rendall, hed viel verzellt, während er wie en Berggeiss de Berg duruf sprunge isch. Er isch de Jacqueline vo de Niederlande ächli z’schnell gsi (d’Jacqueline und de Guido sind mit üs mitgwandered), schliesslich hends in Holland kei Berge wo sie hetti chönne trainiere 😉 De letschti Teil hemmer müesse ufe und abe chraxle und das hed würkli Spass gmacht! Uf de Rückfahrt hemmer no Zebras entdeckt und de Rendall hed üs z’Fuess zu ihne füert.
Am Fritig 28.03. simmer ca. am 10:00 losgfahre richtig Damaraland ufe Campingplatz Mowani Mountain Camp. D‘ Fahrt hetti ca. 4-5h sölle dure. Schlussändlich simmer ca. 10h unterwägs gsi ✌️ Zweimal hemmer müesse chere und em Umwäg fahre, well mer de Fluss ned hend chönne überquere (mer hend je 1-2h verlore). Eis Auto hed versuecht de zweiti Fluss z’überquere, isch stecke blibe und d’Locals hend en denn müesse usezieh/usestosse…
Uf de letschte ca. 50km vor üserem Camping hemmer zwei Reisebüs gseh, wo im Sand stecke blibe sind. De ersti Bus hed scho Hilf gha vomene Auto vonere Lodge. De zweiti Bus, mit Reisende vo Pole, isch no hilflos gsi und üses Auto heds denn gschafft, de Bus us em Sand z’zieh 💪 Churz drufabe heds afo stürme und mier hend wiedermal chum us de Windschutzschiebe gseh. Vo obe sind ganz viel Flüssli über üsi Strass gflosse (uf de letschte Kilometer hend sich die Lodges da zum Glück en teerti Strass gnönnt). Ei Fluss hemmer grad no knapp chönne überquere (ohni Option zum zrugg gah). Ih dem ganze Chaos hemmer de Abzwieger zu üsere Lodge ned gfunde. Vermuetli isch de Wäg sowieso numeno en Fluss gsi 😉 Mier hend uf de Charte gseh, dass witervore en anderi Lodge isch und hend die agstüred (obwohl d’Rezeption nach em 20:00 sicher scho zue hed, aber mit üsem Zält chömmer ja überall pfuse). Au über s’Wägli zu dere Lodge isch scho en Fluss gflosse und es Safariauto, mit zwei Passagier dinne, isch ide Fluete gfange gsi. De Bus mit de Pole hed churz drufab näb üs ghalte und hed das Auto mit üsem Seili welle usezieh (de Bus hed nedmal es Seili debi gha…). S’isch aber z‘ kritisch gsi (sust hetted mier de no beidi müesse rette ;)). Nach öppe 20min isch es Auto vo de Lodge cho und heds nach nomal 20min gschafft, s’Safariauto usezzieh. Ide Zwüscheziit heds ufghört stürme und es Auto voller Locals hed näb üs ghalte. Vermuetli schaffed die fast alli ide Lodges rundrume. Per Zuefall hed eine vo ihne zu üsem Campingplatz müesse, well er det schaffed. Mer hend also ihn und en Frau mit Chind ufglade und er hed üs zu üsem Campingplatz gfüert (de Wägwiser isch am Bode gläge und de Wäg fast weggspüelt gsi – keis Wunder, hemmer die Abzwigig vorher ned gfunde).
Happy end um die 21:00, mer hetted ned dänkt, dass mer no achömed 😉
PS: Jetzt isch de Dominic dra mit Durchfall und mer sind da im Eidechseparadies glandet 😉
PPS: D’Kaffi-Poser-Bilder und de Lüchtturm sind no vo de Stadt Swakopmund.
