Womer am 29.05. uf irgendeme Plätzli be Utvik verwached sind, isch de Himmel über üs blau gsi. Hemmer üse Chopf aber es bitz witer treit, hemmer nur no dunkelgrau gseh. Das isch da grad s’klassische Wätter. Es wächsled im Minutetakt zwüsche Sunne und Räge.
Well de Wätterbricht hüt kei Räge azeigt hed, hemmer in Loen Gstältli und Co. gmieted und hend die 1000hm ufe Hoven über en Chlätterstieg bewältiged. D’Sunne hed üs sogar ächli mit ihrere Aweseheit beehrt und mer hend die schön Ussicht über d’Fjord und See gnosse. S’Pünktli ufm I isch gsi, dass mer ned hend müesse abelaufe, sondern s’Bähnli hend chönne neh 😎 Wieder dunne acho hemmer üs ufe Wäg uf Geiranger am bekannte Geirangerfjord gmacht. Well mer wiedermal hend müesse dusche, simmer uf en chline Campingplatz über Geiranger.
Wäg em Rägewätter hemmer de Geirangerfjord am 30.05. nume vomene Autoussichtspunkt us bewundered. Denn simmer witer is Küstestädtli Ălesund gfahre. De Dominic isch ned so zwäg gsi und hed ide Tüfgarage gschlafe, während d’Linda chli dur s’Städtli isch. Leider sind aber au Städt be Räge ned eso schön azluege. Spöter simmer zäme zumene Ussichtspunkt gloffe und hend d’Stadt vo obe gseh. Chli usserhalb vom Stadtchern hemmer sogar es schöns Plätzli zum Übernachte gfunde und s‘ Wätter heds am Abig doch no guet gmeint mit üs.
De einzig Sunnetag (31.05.) hemmer voll welle usnütze und sind uf Bjørke gfahre. Vo det hemmer en wunderschöni Wanderig zu de DNT Hütte Tyssenaustet gmacht. DNT Hütte ide Berge sind da immer unbewarted im Gägesatz zu de SAC Hütte wo mier känned. D’Hütte liid idyllisch amene See zwüsche vielne Berggipfel. Sie isch für sächs Persone, aber mer hend sie für üs allei gha 🙂 Mer hend uf de Bänkli vor de Hütte gläse und gässe und d’Sunne und die schön Lag gnosse. D’Übernachtig isch bequem aber ächli früsch gsi.
Am nächste Tag hemmer leider be Räge über die rutschige Stei und Wurzle müesse abstiege. Uf de letschte paar Hundert Meter hemmer üsi Händ nüme brucht und denn isch de gueti alti Schirm wieder zum Isatz cho. De Namitag und de Abig hemmer ide Duschi, im Wöschruum und ide Chuchi vom Campingplatz Jølstraholmen verbracht.
