Am Mi 30.04. simmer am Morge früeh in Frankfurt glandet und hend grad de 7ni Zug diräkt uf Hamburg verwütscht (Hostel Hamburg: Meininger City Center). De halbi Tag in Hamburg hemmer gnützt zum d’Stadt um d’Elbphilharmonie ume chli aluege, Fischbrötchen ässe (isch schins es must) und au zum go bouldere. Am nächste Tag isch in Hamburg en Fyrtig (1.Mai) gsi und drum isch viel los gsi ide Stadt. Mer hend drum s’Schiff gnoh und sind chli usserhalb vo de Stadt be Blankenese go laufe (mer sind aber ned die einzige gsi mit dere Idee ;)). Am Abig hemmer üsi neue schicke Chleider agleit und sind is Theater: Harry Potter und das verwunschene Kind. D’Linda isch begeistered gsi und de Dominic hend d’Bünetechnik spannend gfunde 😉 Und es Butterbier dezue hed ned döffe fähle.
Am 02.04. simmer mitm Zug vo Hamburg uf Kopehage gfahre (Hotel Kopehage: CPH Studio Hotel). Uf de Fahrt hemmer üsi nächst Zugreis vo Kopehage uf Ed in Schwede (siehe Foti mitm See) welle bueche. Wäge Bauarbeite hed sich das aber als ned so eifach usegstellt und mer hend dänkt, mer fraged eifach in Kopehage am Schalter. Leider hed die Dame kei Ahnig gha und üsi Lernende im 1. Lehrjahr chönd besser berate (au definitv besser als de Herr am Schalter in Frankfurt). Mer hend üs de sälber einigermasse organisiert und achtung Spoiler: Schlussändlich hemmer Bus, Zug, Zug, Zug, Bus, Bus müesse neh zum Ed erreiche. Ex Bahnhofsvorständin Linda sei Dank! Normalerwiis mues mer nume einisch umstiege 😉
Aber zerst hemmer üsi Ziit in Kopehage gnosse und sind am erste Abig anen Streetfood Märt mit Konzert und super Athmosphäre. Am zweite Tag hemmer all Outdoorläde nach warme Chleider für Schwede und Norwege abklappered, sind aber ned so fündig worde (und sitzed drum jetzt grad nöch bem Füür). Näbst dem hemmer sehr viel Schritt gmacht und de Linda ihre blau Zeche, wo sie am Bett agschlage hed, hed chli müesse liide.
