Ab Ed hemmer am 05.04. en 4 tägigi Kanutour gstarted. De Abieter KanuKing chömmer nur halbwägs empfehle. Es hed zwar alles klapped und sie sind sehr fründlich gsi aber au sehr freestyle und ohni Konzept. Da mer abgseh vom Schlafsack und Göffel fast kei Camping Utensilie debi hend, hemmer alles be ihne gmieted. Grundsätzlich praktisch, aber so wies Mat usgseh hed, luegeds das ami ned ah, wenns zrugg chund 😉 Ned grad Schimmelrüümli, aber en gwüsse Duft isch vorhande gsi.
Am erste Tag hends üs mitm Auto uf Nössemark gfahre (ca. 40km entfernt). Vo det us simmer denn ih dene vier Täg mitm Kanu de See durab wieder uf Ed gfahre. Jede Tag simmer öppe 2-3 Stund ufm See gsi. Die restlich Ziit hemmer mit läse, choche, Gägend erchunde und Ussicht bestune verbracht.
Am erste Tag simmer leider erst ufe See wos scho rächt fest gwindet hed (will die vo KanuKing bis am 11i Zmörgeled hend). Dementsprächend isch üsi erst Fahrt ned sone Spass gsi (de Domi hed sälte so gflueched). Mer hend denn aber benere schöne Füürstell chöne alege und hend de Rest vom Tag trotz Wind gnosse (mit viel Chleider und viel Füür).
Am zweite Tag simmer schlauer gsi und sind bis am 15:00 ah Land blibe. Denn hed sich de Wind gleit und mer hend en gmüetlichi Fahrt chönne gnüsse. Spontan hemmer en chlini Insle (max. 25 uf 35 Meter) als nächste Übernachtigsspot usgwählt. Sehr en gueti Wahl gsi!
Ab denn heds zum Glück nüme so gwindet und d’Sunne hed immer gstrahled. D’Nächt sind trotzdem immer chalt und hert gsi (mer hend leider nur ganz schlächti Mätteli übercho). Trotz Chälti hemmer wiedermal de Vorteil vo de Näbesaison gnosse: Niemer anderst isch unterwägs 😇
Wieder zrugg in Ed hemmer die warm Duschi gnosse (die gits da ned gratis), s’Städtli nochli erchundet (so schöni Hüsli!) und s’letschte Mal d’Rueh igsoge. Vierehalb Täg schwedische Seeätraum sind scho wieder verbi 🥲 (wenigstens üse Rugge freuts 😉)
