De Räge hed ih dene Täg wieder dominiert und d’Motivation entsprächend gsänkt. Am 02.06. simmer mit Zwüschestop in Førde uf Balestrand gfahre. Balestrand liid am schöne und grosse Sognefjord und hed viel schöni und türussehendi Hüsli im „Dragon Style“. Usserdem heds s’Ciderhuset mit ere grosse Uswahl ah diverse Öpfelsäft mit oder ohni Alkohol und gmischt mit de diversiste Frücht. Mer hend mehreri Säft probiert und sind begeistered gsi 😉
Am Abig hed sich d’Sunne doch no zeigt (nacheme sehr rägeriche Tag) und mer hend während em Znacht die schön Ussicht vo üsem Campingplatz us gnosse (Veganeset Camping). Am nächste Morge simmer vo Balestrand uf de 972 Meter höchi Raudmelen gloffe (ohni Räge und Schnee 🤩). Z’oberst hed üs es chlises, gmüetlichs Windschutzhüttli erwarted. Und wiedermal hemmer en schöni Ussicht über s’Fjord gnosse. D’Kamera hemmer leider im Auto vergässe und drum nume schlächti Handybilder gmacht. Nacheme zweite Stop im Ciderhuset simmer 3h uf Bergen gfahre. Det hemmer am 04.06. üses Büssli abgeh und sind nochli dur d’Stadt gschländered. Am 16:45 hemmer die bekannt Bergenbahn bis Oslo bestiege (Akunft Oslo: 00:50). Das isch da fast so chli de „Glacier Express“. Eifach ned glich schön 😉
Morn tränned sich üsi Wäg für en Wuche. D’Linda gad uf Wettinge as Jublasurium und de Dominic chund in Oslo Bsuech vo de Michèle, de Angi und de Cinzia über.
