Mer hend entschiede, dass mer am schöne Wätter nachegönd und hend üsi Unterkunft für die nächste drü Nächt drum ganz im Süde ade Küste bueched (Ăpta Camping ide Nöchi vom Flekkefjord). In Kristiansand, witer östlich, isch zwar no meh Sunne agseid gsi, allerdings isch d’Landschaft det no flacher und de Wäg dethere wer nochli länger gsi. Drum hemmer üs mit halbsunnigem Wätter zfriede geh 😉
Am 15.06. simmer ned diräkt zum Ăpta Camping, sondern hend en Umwäg über de Lysefjord gmacht. Am Mittag hemmer in Lysebothn d‘ Fähri gnoh und sind bis Flørli gfahre. Det gits ganz viel verschideni Wandermöglichkeite. Mer hend üs für die gmüetlich (und erstunlicherwiis einsam) Klippewanderig entschiede. D‘ Ussichte und d’Stimmig sind grossartig gsi 😀 Usser wo d’Linda wiedermal de falsch Wäg gwählt hed, well sie offesichtlich ned mal mit GPS richtig chan Charte läse…
De Keisi und d’Nina hend üs empfohle uf d‘ Insle Hidra zgah, wo grad vor de Küste vo Flekkefjord liid. Das hemmer am 16.06. in Agriff gnoh. Mer sind zerst durs sympathische Flekkefjord gloffe zum det es Kaffi sueche und warte, bis d’Sunne chund. S‘ Englevakten Cafe hed üs begeistered bis mer gseh hend, dass en Teil vom „Vater unser“ ade Wand stad… Das hed üs chli irritiert. De Spaziergang am Namitag uf Hidra isch widermal sehr windig gsi aber es isch uf jede Fall en guete Tipp gsi. Am Abig hed d‘ Linda am schöne Strändli vom Camping nochli gläse während de Domi sich meistens lieber dinne als dusse ufhalted (es isch chalt mimimimi) 🤷♀️
Als Bahnfreaks hemmer usegfunde, dass mer in Flekkefjord chan Dresine fahre. Das hemmer am nächste Mittag in Agriff gnoh und sind mit de Dresine 17km uf de Bahnlinie gäge Norde gfahre und denn wieder zrugg. Mer hend pro Wäg ganzi 1.5h gha – mer hetted dänkt, mer sind schneller… S‘ isch aber definitiv empfehlenswert! Mal öppis anders und mer hend chönne, vorallem bem durabfahre, d‘ Umgäbig bewundere 🙂 Usser ih de 17 stockdunkle Tunnell. Denn ischs empfehlenswert, dass mer Taschelampe mitnimmt, wo no Batterie/Akku hend 😉 uuupps
Für üsi zweitletscht Nacht in Norwege hemmer no es letschts Mal en DNT Hütte bueched. Dasmal hemmer am Code fürs Schlüsselchästli leider chli müesse hinderherränne. Die letschte paar Mal hed das immer super klapped 🤷♀️ Mer sind zum Văningshuset pă Li gloffe und hend ufm Wäg en super Ussicht uf d‘ Insle Hidra gha. Mer hend im Vorus gläse, dass es im Huus Chlätterstiegusrüstig für de Chlätterstieg hed, wo ide Nöchi started. Mer hend beides abcheckt, aber es hed beides sehr sälber bastled usgseh… Drum hemmer üs mit üsne Büecher zfriede geh 😉 Lustigerwiis sind am Abig no zwei Schwizer be üs go chlopfe (abgseh vo ihne simmer niemerem begägnet). Sie hend en Fisch gfange und hend üsi Grillstell und Alufolie us üsere Hütte brucht.
Am 19.06., ah üsem zweitletschte Tag, simmer über en Ussichtspunkt zrugg zu üsem Auto gloffe und uf Stavanger gfahre. Nach dere günstige Nacht ide DNT Hütte, hemmer üs für die allerletscht Nacht s‘ zweitbeste Hotel in Stavanger gleisted. Au s‘ Wätter hed sich nomal vo de beste Siite zeigt, dass mer die zwei halbe Täg im wunderschöne Stavanger nomal richtig hend chönne gnüsse. Mer hend sogar churzärmlig chönne umelaufe. Dass mer das no hend döffe erläbe..! 😉 De Domi isch im Ölmuseum gsi, d‘ Linda hed die härzige Lädeli durstöbered, mer hend nomal Kanelknute/Kanelsnurr/Kanelboller (wie au immer) gässe, Mocca trunke (wiedermal es feins Getränk wos be üs ned gid…), ….
